‘Saol trí Ghaeilge atá uainn …’ 

Tá Éire le tamall ar an tír is mó a mbaineann teannas teangeolaíoch léi, agus argóintí anglalárnacha ó staraithe an athbhreithnithe agus ó iriseoirí gáifeacha ag déanamh beag is fiú de phobal mionteanga a bhfuil a chearta go fóill faoi chosaint bhunreacht na Poblachta. Níl oiread is bliain ann ó thug an tUachtarán féin cosaint do stádas na teanga go poiblí nuair a thréaslaigh sé le Duolingo an obair a bhí déanta acu ó thaobh 2.3 milliún foghlaimeoir ó gach cearn den domhan a chur ar bhóthar na Gaeilge. Thug an tUachtarán Ó hUigínn le fios ar an ócáid sin i mí na Samhna 2016 gurbh ann do dhaoine a déarfadh leat go mbaineann buntáiste anois le bheith aonteangach sa Bhéarla. Ba é cáineadh tromchúiseach an uachtaráin ar dhearcadh mar é ná go mbeadh a leithéid bunoscionn le luachanna na sochaí daonlathaí.