Sé ní faoin Ghaeilge a d’fhoghlaim muid ó cháipéisí stáit 1988 ...

Dhiúltaigh an Taoiseach, Garret Fitzgerald, scun scan d’iarratas ó Chonradh na Gaeilge go reáchtálfaí fiosrúchán poiblí 30 bliain ó shin chun staid na Gaeilge agus na Gaeltachta a scrúdú. Mhol Rúnaí Príobháideach an Taoisigh, don Dr Fitzgerald an chluas bhodhar a thabhairt d’achainí an Chonartha ar chúpla cúis. Ar an chéad dul síos dúradh go mbeadh a leithéid d’fhiosrúchán poiblí ag teacht salach ar an obair a bhí ar bun ag an Chomhchoiste Oireachtais don Ghaeilge. San áireamh i dtéarmaí tagartha an Chomhchoiste bhí athbhreithniú a fhoilsiú agus moltaí a dhéanamh maidir le cur chun cinn na Gaeilge go ginearálta. Dúradh fosta go raibh Bord na Gaeilge i mbun oibre ar a phlean gníomhaíochta eile don Ghaeilge agus go mbeadh sé sin foilsithe go luath ina dhiaidh sin. Scríobh Rúnaí Príobháideach an Taoisigh chuig an gConradh i 1986 ag rá leis gur chreid an Taoiseach nach mbeadh sé cuí fiosrúchán poiblí a thionscnamh go dtí go mbeadh deis aige moltaí an Chomhchoiste agus Bhord na Gaeilge a scrúdú.