Ar leithlis
Mark Wickham
Nuair a thiocfaidh na blianta orainn
agus go n-imeoidh cuimhní ar strae
cuimhnímís
ar ghrian mhilis earraigh
ar thráín tréigthe
cosc ar an bhfuadar
agus gach rud práinneach
ar ceal.
Suite in íocshláinte na táimhe
ar úrghaineamh meala
gan farainn ach draíocht na dtonn
is duileasc rua ag drithliú
ar charraig thais,
tá citeal stáin ag caitheamh tobac
ar thine cipíní raice
blas deataigh ar chupán tae
atá níos saibhre ná aon Americano.
Cuimhnímís ar shiansa na n-éan
i seilbh arís ar ríocht na spéire
ceol cruinne ag séideadh
osna mhín
ar bhachlóga torracha
is a mbláthanna ag pléascadh.
As allas ár gcnámh
na prátaí síl ag síneadh a gcos
sna hiomairí
ár mbuíochas measctha tríd
an ithir mar éarlais uainn
do thál
na bliana seo chugainn.
Cuimhnímís ar gheallúintí an earraigh úd
nuair ba Dhomhnach ár n-óige
arís gach dálach
tost an tsuaimhnis ar an dúiche
agus insan easnamh,
flúirse.