Tréimhse chorrach curtha de ag an Rialtas

De réir a chéile, tá a shéala agus a lorg fhéin á fhágáil aige ar Oifig an Taoisigh. Bhí sé de mhí-ádh air i dtús ama go raibh sé ina phríosúnach ag an phaindéim ach gheobhaidh sé moladh mór as muid a stiúradh fríd an ghéarchéim go stuama (ach go faichilleach). Tá sé tagtha chuige fhéin go láidir agus is beag meancóg atá déanta aige le bliain anuas. Tá sé ag réiteach níos fearr leis an Tánaiste anois tar éis conspóid na sceite. Tá meas ag an phobal ar a chuid ionracais agus tá blas an státaire ar a chur i láthair nuair a bhíonn ceist an Phrótacail á hionramháil aige. É sin ráite, ba cheart dó guaim a chur ar a fhearg agus é i mbun iomrascála sa Dáil le ceannaire Shinn Féin agus le teaghlach Healy-Rae. Chaith sé tréimhse sách fada san fhásach le go dtuigfeadh sé an ról atá ag an fhreasúra. Lena chois sin, caithfidh sé a sciar fhéin den locht a iompar as teip an rialtais dul i ngleic leis an ghéarchéim (nó ‘tubaiste’) tithíochta.