An grá don dúchas…

Is i gContae Mhuineacháin atá an líon is airde cainteoirí laethúla Gaeilge, diomaite de na contaetha Gaeltachta agus de Bhaile Átha Cliath, de réir dhaonáireamh 2022. Is ann fosta atá an céatadán is airde scoláirí sa stát atá ag freastal ar ghaelscoil nó ar ghaelcholáiste. Tráthúil go leor, is de bhunadh Mhuineacháin í Caitríona Ní Chléirchín, scoláire litríochta agus file bisiúil a shaothraíonn trí mheán na Gaeilge. Cé gur i mBaile Átha Cliath atá sí ag cur fúithi le corradh is fiche bliain anuas, tá a cuid filíochta préamhaithe in oidhreacht liteartha agus chultúrtha a ceantair dhúchais. Tá dhá bhunchnuasach léi i gcló: Crithloinnir (2010) a ghnóthaigh duais Oireachtais i mbliain a fhoilsithe, agus An Bhrídeach Sí (2014) a ghnóthaigh Duais Mhíchíl Uí Airtnéide in 2015. Tá sí ar dhuine den deichniúr filí Gaeilge nua-bhunaithe ar cuireadh dánta leo i gcló sa díolaim Calling Cards (2018). Sa bhliain 2020, foilsíodh an cnuasach dátheangach Talk of the Town, rogha dánta léi aistrithe go Béarla ag Peter Fallon. Fite fuaite leis an ómós áite atá chun tosaigh mar théama ina cuid filíochta, tá braistint íogair na mná comhaimseartha a fhéachann le cás na mban san am atá thart nó sa bhéaloideas, leoga, a shamhlú agus a chur in iúl. Ba mhaith liom cardáil a dhéanamh ar an dá phríomhthéama sin agus ar an dóigh shainiúil a ndéanann Ní Chléirchín iad a shaothrú ina cuid filíochta.