An tsamhlaíocht agus saol na máthar

Ní i gcónaí a bhí an deis ag mná na hÉireann plé oscailte, poiblí a dhéanamh ar a dtaithí phearsanta ar shaol an teaghlaigh, nó fiú ar a dtaithí saoil trí chéile, mar a dhéanann Doireann Ní Ghríofa ina saothar. Cé go bhfuil sé ríthábhachtach aitheantas a thabhairt d’éachtaí bhanscríbhneoirí na hAthbheochana ag tús an fichiú haois, bhí a gcuid scríbhneoireachta gann ar léirithe suntasacha ar shaol na mban – bhain feidhmeanna eile le litríocht na tréimhse sin, dar ndóigh. Le himeacht na mblianta, tháinig roinnt bheag banscríbhneoirí eisceachtúla chun cinn a thug dúshlán don imeallú a deineadh ar ghlór na mban, ach léiríonn Ríona Nic Congáil agus Máirín Nic Eoin ina n-aiste ‘Writing in Irish, 1900-2013’, a foilsíodh sa leabhar A History of Modern Irish Women’s Literature, nár tháinig borradh ceart faoi shaothar na mbanscríbhneoirí Gaeilge go dtí na 1990idí, nuair a cuireadh tús le gluaiseacht liteartha dá gcuid féin.