I ngéibheann sa bhaile

Baineann go leor de shaothar Réaltán Ní Leannáin le saol agus ról na mban sa tsochaí. Gné shuntasach dá saothar is ea an aird a tharraingíonn sí ar thaithí na mban i dtuaisceart na hÉireann agus í ag tarraingt ar a hóige ar Bhóthar na bhFál i mBéal Feirste le linn na ‘dtrioblóidí’. Tá tábhacht ag baint leis an saothar seo mar go mbíonn an ról lárnach a bhí ag mná agus máithreacha le linn na tréimhse sin infheicthe in amanna, agus na scoláirí ag díriú barraíocht, dar le hEilish Rooney, ar ‘power politics… the personalities, political parties and armed groups’ (2006: 358). Déanfar anailís san aiste seo ar ghearrscéal amháin as an chnuasach Dílis, ‘Teas’, chun iniúchadh a dhéanamh ar an dúshlán a thugann Ní Leannáin do na steiréitíopaí inscne agus na híomhánna traidisiúnta den bhean a bhí sa treis ar feadh i bhfad sa scríbhneoireacht stairiúil agus sa léiriú ar an mháthair náisiúnach/Chaitliceach, go háirithe. Cuireann Ní Leannáin béim fosta ar an tábhacht a bhaineann leis an bhaile mar thearmann agus an dóigh is féidir le coimhlint agus foréigean bualadh isteach ar an bhaile chomh maith.