MISE AGUS AN SnoDACH - Caitríona Ní Chléirchín

Is í an chuimhne is mó atá agam ar Phádraig Ó Snodaigh ná na glaonna gutháin a chuir sé orm ag fiafraí díom: ‘Cá bhfuil an chéad chnuasach eile?’ Bhí sé i gcónaí an-tacúil mar fhoilsitheoir agus thug sé misneach dom mar fhile agus mé ag tosú amach. Ardú meanman i gcónaí a bhí ann dul i mbun cainte agus comhrá leis. Chuireadh sé i gcónaí sna trithí gáire mé leis an fhriotal ‘ildaite’ a bhí aige agus féith an ghrinn ann go deireadh a shaoil. B’fhear an-tuisceanach a bhí ann fosta a thug cluas éisteachta don scríbhneoir cráite. Tá mé iontach buíoch dó as na cnuasaigh liomsa a chuir sé i gcló le Coiscéim agus as an chomhairle a chuir sé orm ina leith. Beannacht Dé lena anam uasal.