Gradaim an Chúigiú Colúnaí 2016

Deirtear gurb í Heather Aire na Gaeltachta. Deir sí féin go bhfuil na cumhachtaí sin ar fad ‘tarmligthe’ aici do Sheán Kyne, agus gur ag an Aire Stáit amháin atá cumhacht ar Ghaeil. Diúltaíonn sí bualadh le heagraíochtaí Gaeilge dá bharr, agus ní thógfá an méid sin uirthi, is dócha. (Tugann an Cúigiú Colúnaí cuid mhaith dá shaol ag iarraidh iad a sheachaint chomh maith.) Ní fhéadfadh ach meas a bheith ag duine ar chutzpah an Aire. I mí na Bealtaine chuir sí olc ar mhórán nuair nár bhac sí teacht i láthair do mhórdhíospóireacht Dála faoin nGaeilge, agus nuair a tháinig sí isteach sa Dáil faoi dheireadh an tráthnóna sin thosaigh sí ag caitheamh anuas ar dhaoine a bhíonn ‘ag tabhairt léachtaí’ do dhaoine nach bhfuil Gaeilge acu. Ba mhó dochar ná maitheas a dhéanann daoine a bhíonn ag caitheamh anuas ar easpa Gaeilge daoine eile, a dúirt sí, cé nach ndearna aon duine a leithéid le linn na díospóireachta. B’fhéidir gur thug a seasamh láidir i gcoinne a naimhde nárbh ann dóibh misneach don Aire mar cúpla mí ina dhiaidh sin, thug sí a céad chuairt oifigiúil ar an nGaeltacht, dhá bhliain i ndiaidh a ceapacháin. Ba aici a bhí ráiteas na bliana chomh maith: ‘Even if we use only a few words of Irish, we should think about Irish, and we must encourage more of that.’ Ba chóir go mbeadh an méid sin ina shólás do Ghaeil. Cinnte, téann Heather i bhfraoch ó am go chéile ach féach go mbíonn sí ag smaoineamh ar an nGaeilge, nó ar laghad go mbíonn sí ag smaoineamh ar smaoineamh ar an nGaeilge…