An cath cultúrtha

Tá an íoróin go flúirseach i scéal an Achta Gaeilge ó thuaidh, agus ní milis i gcónaí mar íoróin í. An stát atá ar nós cuma liom le fada an lá faoi chearta teanga ó dheas ag tacú leis an éileamh ar reachtaíocht teanga ó thuaidh. Uaisle an aontachtais ag seanmóireacht faoin ‘bhforlámhas cultúrtha’. Sinn Féin, a lig le sruth an oiread sin deiseanna an teanga a chur chun cinn sa Tuaisceart ar mhaithe le féiríní eile, agus gan iad sásta orlach a ghéilleadh anois. Tráchtairí mór le rá ó dheas i mbun marana ar chearta teanga agus an tábhacht a bhaineann leo. An DUP ag cur áiféis i leith Shinn Féin agus ag déanamh beag is fiú den éileamh ar Acht don Ghaeilge amháin fad is atá aitheantas reachtúil á lorg acu don Ultais, ‘hamely tongue’ nach teanga í in aon chor, dar le Wallace Thompson, duine de bhunaitheoirí an DUP féin.