Colúr Coille
Gréagóir Ó Dúill
Rómhór d’fhaiche an ghairdín chúil sa bhruachbhaile
Atá an colúr ramhar, a chleití gealdaite, a shiúl mall luascach,
A eitilt anuas, aníos; rómhór
Agus saghas amscaí, ciotach,
Corp an cheannaí láidir aige,
Slabhra óir ar a veist lán. Ar ardú eireabaill
An tón cuimir, an bolg cruinn,
An líne aniar, an cloigeann, an muineál, an droim
Grástúil, iomlán, dínit chléirigh ann.
Ní haon cholúr cathrach é, ach colúr coille,
An feisteas cuí. Is áille dá réir, is dúchasaí,
Nó is andúchasaí ach is aiceanta,
Síochánta – gan aon uirlis chosanta aige
Ach monamar sásta baincéara, sin nó
Teicheadh callánach, a imeacht ag briseadh brainsí.