Oilithrigh
Trostán chun siúil,
sliogán ar chúl,
buailimid bóthar
san aontreo siar.
Tógaim ceann
den dream teann
lom go cnámh
ag coisíocht leo féin,
síonchaite sa dreach
ó smúdar an tsaoil,
na súile ina gcaor
le tine ghlé.
Ní shantaím aon ní
ach siúl romham,
glacadh le gach céim
mar a gheobhad.
Tá talamh an domhain
mhóir lem bhonn,
tá áthas an domhain
mhóir lem thaobh,
allegro ó ghob go gob;
is go tobann brostaím
mo choiscéim féin
ar aonbhuille leis na héin.