Ceacht Staire ar mhaithe le Noel Grealish agus Verona Murphy
En mon pays suis en terre lointaine
– VILLON
Thánamar aniar
gan colún scamaill mar threoir,
thánamar aneas
gan colún lasrach mar chompás
‘Warning: no more migrants here!’
Tháinig fir
an pharóiste ar cuairt ar dtús,
chonacadar
an talamh geallta, síoda glas
Dúradar
an choróin Mhuire ar a nglúine
os comhair
dhealbh Naomh Pádraig ag Teamhair
‘People being brought...through migration
schemes were no asset’
Bhogamar
ann is chrom ar dhul
i dtaithí ar
chéacht, ar chapaill, ar easpa asal
Ar dtús chuireamar
an chruithneacht ró-dhoimhin
is theip ar
an bhfómhar, níor tháinig an geamhar
‘Wake Up! Remember there is a cuckoo in the nest!’
Ach bhíomar
rólíonmhar, an fheirm róchraptha:
cloch chora ar
an mbealach anonn go Sasana
I Leeds, i mbeár,
bhíos ag canadh ‘An Caiptín Ó Máille’
nuair a bhéic an t-úinéir
‘No fuckin’ Paki music in here!’
‘The time is obviously overdue when some...
Should be sent back to where they come from’
‘Cén pictiúr
a fheiceann tú ar dhúnadh do shúile?’
‘An bóthar,
an bóthar a shiúlainn...’
Nóta: Ó nuachtáin áitiúla na 1930idí agus 1940idí a thagann na giotaí Béarla idir na ranna sa dán seo. Ráitis iad a dúirt an Teachta Dála Patrick Giles sa Dáil nó a bhain le graifítí. Bhaineadar ar fad le bunú Ghaeltacht na Mí.