AISLING AN AINRIALAÍ
Deirtear go raibh fógra aige chun tosaigh
‘Here Comes Oliver Flanagan’
Agus fógra eile ar chúl an rothair
‘There Goes Oliver Flanagan!’
Dá mbeadh móramh sa Dáil ag an gComhaontas Glas
Bheadh an rothaíocht éigeantach.
Mar a dúirt fear seoigh éigin:
‘Níl i nGlasach ach Fine Gaelaí ar rothar.’
Táimse bréan bailithe díobh go léir.
Ba mhaith liom léim ar sheanrothar –
Pingin agus feoirling –
Agus éalú liom: áit chluthar a aimsiú
Nár shiúil aon pholaiteoir fós ann
Nár gearradh ribín ann
Nár cuireadh crann
Nár ceapadh polasaí
Nár tugadh óráid
Nár eisíodh preasráiteas
Nár pógadh leanbán ar a bhaithis ann.
Bheadh pearóidí glasa ann
Is mhúinfinn dánta Gaeilge dóibh:
Aoibhinn bheith i mBinn Éadair,
fírbhinn bheith ós a bánmhuir,
cnoc lánmhar longmhar líonmhar,
beann fhíonmhar fhonnmhar ághmhar . . .
Pearóidí nach n-aithneodh an eite dheas
Thar an eite chlé is bheadh moncaithe ann
Is cnónna saor in aisce acu mar dheontas
Agus bheadh an domhan á rialú féin chomh séimh
Leis an Ting-a-Ling-a-Ling sin óm’ phingin is feoirlingse
Is ní bheadh gá le both vótála, le Níl ná Tá
Gan cur isteach ná cabhair ó éinne, gan fabhar
Is sinn go léir léir léir ar snámh i mbánmhuir