Faoi léigear le gasúr, 2020

Tá an rialtas tar éis na bunriachtanais a leagadh amach dúinn agus muid faoi léigear. Codladh na hoíche? Bunriachtanas más cat thú – easair ar an liosta de sheirbhísí riachtanacha. Leapacha do dhaoine? Níl sé sin ar an liosta, a phleidhce, ní seo an t-am chun do theach a mhaisiú … (ach cogar, dúirt bean liom go ndúirt bean léi go bhfuil siopa sa cheantar atá in ann péint a dhíol, mar go ndíolann siad easair freisin – agus an scéal céanna le tuiscint ó bhallaí nualonracha na gcomharsan). Aontaíonn an gasúr s’againne leis an rialtas, is cuma leis gur cuireadh an leaba dó ar ceal, nach gcuireann sé fáilte is fiche romham sa chliabhán gach oíche ag a dó a chlog? ‘Barróigín, barróigín’, a scréachann sé in ard a ghutha má táim drogallach, agus ansin soipríonn sé síos go deas compordach ag cur caoi ar mo chosa le ciceanna beaga, fad is a thugann an naíonán sa bhroinn poc sa bholg dom chun a chearta féin a chur in iúl, agus mothaím go bhfuil riastradh ag teacht orm, idir easpa codlata agus easpa slí.