Samhradh machnaimh

An t-am seo anuraidh bhí Fianna Fáil in umar na haimléise. Ní dhearna siad an dul chun cinn a raibh siad ag súil leis san olltoghchán agus iad ar a nglúine ag impí ar a seanchéile comhraic an leaba a roinnt leo. Tubaiste a bhí sa chéad cúpla mí don pháirtí i mbun rialtais agus beirt airí talmhaíochta caillte acu in achar gairid ama. Cinneadh dalba ab ea é na haireachtaí is mó freagracht agus is leochailí a shantú nuair a bhí an chreach á roinnt idir na trí pháirtí rialtais ach ní raibh siad ábalta a ngealltanais a chur i gcrích. Bhí easpa taithí roinnt dá gcuid airí follasach do chách agus meancóga go leor déanta ag leithéidí Stephen Donnelly, Darragh O’Brien agus Norma Foley. Tá an páirtí i riocht i bhfad níos láidre anois agus cuma an státaire ar a gceannaire ar deireadh thiar thall tar éis bliain achrannach i mbun oifige. Cé go raibh ráta sástachta Fhianna Fáil iontach íseal sna pobalbhreitheanna (chomh híseal le 11% go náisiúnta agus 6% san ardchathair) tá borradh de bheagán tagtha orthu le tamall gairid anuas a bhuíochas don rath atá ar an chlár vacsaínithe. Beidh sé ina bhuntáiste ag an pháirtí gur le linn tréimhse Leo Varadkar mar Thaoiseach a dhéanfar na ciorruithe ar chaiteachais phoiblí a bheas de dhíth chun íoc as na pacáistí tarrthála flaithiúla a bronnadh le linn na paindéime.