Scrúdú coinsiasa Fhianna Fáil

Tá Fianna Fáil i mbun scrúdú coinsiasa faoi láthair lena bhfuil i ndán dóibh a mheas. Thug an tAire Stáit Seán Fleming le fios le gairid go bhfuil an t-athbhreithniú a rinne sé ar mar a d’éirigh leis an bpáirtí san olltoghchán anuraidh ullmhaithe aige agus tugtha ar láimh don Taoiseach. Chuir sé an-bhéim ina chuid cainte ar an tuarascáil a bheith cuimsitheach agus uileghabhálach. Níl sé taobh le tuairimí an choiste a bhfuil seisean i bhfeighil air ná tuairimí bhaill tofa an pháirtí. Labhraíodh leis na baill ar fad le tuairimí a fháil faoin riocht ina bhfuil an páirtí - bhí 3,000 duine ar fad páirteach sa phróiseas. Beidh an cháipéis mar ábhar léitheoireachta ag Micheál Martin má fhaigheann sé deis dul ar saoire go Cúirt Mhic Shéafraidh i mbliana. Tá moltaí sa tuarascáil freisin a deir Fleming agus pléifear iad ag cruinniú den pháirtí parlaiminte agus d’Ard-Chomhairle an pháirtí go luath. An mbeidh dóthain ann leis an bpáirtí a neartú agus téarnamh a spreagadh? Sin í an cheist!