Tá go leor údar ceiliúrtha ann

Is maith is cuimhin liom dul ar saoire teaghlaigh go hAbhainn an Scáil ar imeall Ghaeltacht Corca Dhuibhne mar dhéagóir agus tathant ar m’athair mé a thabhairt siar chomh fada le Baile na nGall go mbuailfinn cnag ar dhoras Raidió na Gaeltachta. Bhíomar ag éisteacht leis an stáisiún ar an meántonn, an comhartha ag dul i dtreise de réir mar a ghluaiseamar siar, agus bhí na habairtí Gaeilge a bhí fúm a labhairt á gcleachtadh agam arís agus arís eile i m’aigne. Ní cuimhin liom cé a bhí romham i mBóthar na Léinsí ach chuireas mo cheist i nGaeilge, fuaireas mo bhileoigín eolais faoi stair an stáisiúin agus d’imíos liom go sásta. B’in an chéad chomhrá Gaeilge a dheineas sa Ghaeltacht agus chuir sé tús le caidreamh le hiarthar Duibhneach a mhaireann go dtí an lá inniu.