Uisce faoi chaisleán

Bhí an chuma chéanna ar na pasáistí cloiche dorcha uile a luigh faoi thalamh an chaisleáin, agus ní raibh Naoise in ann faic a chlos ach na tinte ag cnagarnach sna sconsaí ar an mballa agus a chroí ag preabadh ina chluas. Réab sé tríd na pasáistí, ag leanúint na dtreoracha a scaoil an ridire ólta leis sa tábhairne an oíche roimhe. An tríú casadh ar dheis… an chéad chasadh ar dheis ina dhiaidh sin… síos an staighre ar thaobh na láimhe clé… Bhí a fhios aige go raibh a cheann scríbe bainte amach aige nuair a chonaic sé sconsaí níos cóngaraí dá chéile ar an dá thaobh de chúinne. Stad sé sular chas sé an cúinne lena chlogad a dhíriú, a chliabhrach a ardú, agus le cúpla análú mall a dhéanamh.