Na mná a maraíodh

Bíonn dúshlán ar leith le sárú ag Anna Heussaff nach cás leis na scríbhneoirí eile atá faoi chaibidil san eagrán seo. Cé go n-áirítear í ar phríomhscríbhneoirí próis na Gaeilge agus duaiseanna go leor bronnta uirthi, is minic a bhíonn uirthi an seánra liteartha is rogha léi a chosaint; is é sin seánra na scéalta bleachtaireachta. In agallamh san Irish Times sa bhliain 2004, d’áitigh sí go raibh ‘fiúntas le go leor scéalta mistéire’ bíodh is nárbh ionann an cur chuige a chleachtar sa seánra sin agus an ealaín a shamhlaítear le leithéidí Ulysses nó Cré na Cille. In agallamh eile sa bhliain 2015, d’aithin sí go raibh ‘daoine ann, gan amhras, a chreideann nach bhfuil i scéal bleachtaireachta ach féasta foréigin, nó foirmle gan téagar’ agus d’fhógair arís nach ‘mar sin atá, dar liom’.