Darach Ó Scolaí

Ceann de mhórbhuanna Sheathrúin Chéitinn ab ea an dea-scríbhneoireacht, rud a chabhraigh go mór chun an stair a scríobh sé, Foras Feasa ar Éirinn, a chur á cóipeáil agus á léamh i measc an phobail sa 17ú agus san 18ú haois. Fearacht an Chéitinnigh, is scríbhneoir soiléir soléite an staraí Vincent Morley. Nuair a léim a mhórshaothar Ó Chéitinn go Raiftearaí: Mar a Cumadh Stair na hÉireann, meabhraítear tábhacht na staire mar ábhar léitheoireachta dom, ní mar théacsleabhar do staraithe amháin ach mar ábhar pléisiúir dóibh siúd ar mian leo tuiscint níos doimhne a fháil ar fhios fátha an scéil.