Eagarfhocal

Reáchtáladh an chéad chomhdháil idirnáisiúnta ar Litríocht Ghaeilge na nÓg i gColáiste Phádraig sa bhliain 2011 agus sa chnuasach aistí a d’eascair as an gcomhdháil sin, mhaígh an tOllamh Ríona Nic Congáil go raibh ‘an chuma ar litríocht Ghaeilge na n-óg go [raibh] sí tagtha faoi bhláth den chéad uair riamh.’ Níl amhras ar bith ann ach go bhfuil litríocht Ghaeilge na n-óg ag bláthú léi ó shin. Is mór an phribhléid dom a bheith mar aoi-eagarthóir ar an móreagrán seo beagnach ceithre bliana déag ar aghaidh ón gcomhdháil chinniúnach sin a thug aitheantas do sheánra litríocht Ghaeilge na n-óg den chéad uair riamh.