Bréanainn na staire agus na samhlaíochta 

Tá grianghraf amháin a bhainfeadh an anáil díot le hionadh agus le halltacht díreach roimis an téacs amach: sé tá ann ná ceann de na crosanna móra adhmaid de Stáisiún na Croise ar an tslí in airde á nochtadh go glórmhar as an mbrat sneachta ina thimpeall agus an sneachta séidte, síobtha reoite ina sheasamh ina steillbheathaigh ó chúl na croise amach. Tugann sé an pictiúr cáiliúil sin le Salvador Dali de Chríost céasta á nochtadh as an ndorchadas chun cuimhne; agus na línte scanrúla sin ó ‘Adhlacadh mo Mháthar’ an Ríordánaigh: ‘... is i lár na balbhbháine i mo thimpeall – do liúigh os ard sa tsneachta an dúpholl.’ Ach in ionad céasadh agus uafás an bháis faoi mar atá ag Dali agus Ó Ríordáin, tá sa ghrianghraf seo den gcros sa tsneachta, siombail an aiséirí, siombail chruthanta den ardú meanman a dheonaítear don té a dhéanann an turas go barr Chnoc Bréanainn.