Na Leabhair a Thug Sásamh Dúinn i mBliana…

Is minic a bhítear ag cáiseamh teirce na bprós-saothar ag mná na Gaeilge agus, dá bhrí sin, ní hiontas ar bith go bhfáilteofaí roimh ghuth úr baineann i ngort an phróis. Scéalta drámatúla a thugann léargas grinn tuisceanach ar chúrsaí caidrimh agus teaghlaigh, ar mhianta agus ar údair mhearbhaill an duine atá sa chéadchnuasach cumasach seo ó Réaltán Ní Leannáin, Dílis (Cló Iar-Chonnacht, 2015) Tá na scéalta suite i ndomhan so-aitheanta an réalachais shóisialta — in ospidéal, i dteach cónaithe teaghlaigh, i bpáirc phoiblí, nó in árasán uaigneach mná aonair — ach tá sé de bhua ag Ní Leannáin teannas mothálach an scéinséara a chruthú trí roghnú íogair na sonraí a bhfuil aird an léitheora le díriú orthu, tríd an lomchur síos snoite ar dhaoine agus a dtimpeallacht fhisiciúil agus trí úsáid éifeachtach an chomhrá. Tá scéalta sa chnuasach ar dheacair dearmad a dhéanamh orthu, ar nós an tsárscéil ‘Clic’ faoin teagmháil i suíomh ospidéil idir bean óg agus an seanfhear a d’éignigh le linn a hóige í. Seachnaítear stíl theagascach an mhorálaí sa scéal cumhachtach seo a choinníonn an léitheoir ar tinneall ó thús deireadh. Is minic casadh caolchúiseach ag deireadh scéil sa chaoi nach scaoiltear an teannas go hiomlán, ach go bhfágtar an léitheoir ag machnamh ar chúinsí sóisialta agus síceolaíocha na gcaidreamh ina bhfuil na carachtair gafa.