‘My son will say these words…’

Ba aistritheoir bisiúil é Michael Hartnett le linn a shaoil scríbhneoireachta. Go luath sa tsaol scríbhneoireachta sin, d’fhoilsigh sé leagan den Tao agus d’fhilíocht Sikong Tu. Dhein sé leagan Béarla de Romancero Gitano le Federico Garcia Lorca, agus mhaígh sé gur d’aon ghnó len é sin a dhéanamh a chuaigh sé chun cónaithe sa Spáinn. D’aistrigh sé ábhar ón tSean-Ghaeilge agus ón Meán-Ghaeilge, leagan suntasach de ‘An Chailleach Bhéara’ san áireamh. D’aistrigh sé rogha leathan de shaothar Nuala Ní Dhomhnaill. Dhein sé leagan Gaeilge de dhán fada leis an scríbhneoir Ferenc Juhász faoin dteideal An DamhMhac. D’fhoilsigh sé saothar le hAogán Ó Rathaille, le Dáibhí Ó Bruadair agus le Pádraigín Haicéad. Sa leabhar iarbháis leis, Translations (Gallery Press, 2003), foilsíodh don gcéad uair leaganacha Béarla de Catullus agus Heine. Ina theannta sin, d’aistrigh sé a shaothar féin, ó Ghaeilge go Béarla agus sa treo contráilte chomh maith. Agus tá A Necklace of Wrens (Gallery Press, 1987), rogha dá chuid dánta Gaeilge maille le haistriúcháin leis féin, ar cheann dosna leabhair filíochta is fearr a foilsíodh in Éirinn, in aon teanga, sa dara leath don bhfichiú haois. Ach ina dhiaidh sin, ní ar a shaothar aistriúcháin sa ghnáthchiall amháin ná go príomha ba mhaith liom díriú. Go deimhin féin, an chuid is mó dosna dánta go mbeidh mé ag féachaint orthu, ní aistriúcháin nó fiú leaganacha iad sa ghnáthchiall in aon chor.