Cur i gCéill

An béile thart, síneann sí siar os comhair na teilifíse agus, mar is iondúil di, casann ar TG4 ar dtús leis an nuacht a chloisteáil. Inniu scéal an bhá an príomhscéal. Níl ainm na hógmhná eisithe ag na Gardaí go fóill. Ná níor tháinig tuilleadh sonraí faoin tubaiste chun solais san idirlinn. Leanann na scéalta eile. Níl Cass in ann a hintinn a dhíriú ar aon cheann acu, áfach, agus í ag smaoineamh ar an méid a tharla i bhfogas céad slat di. Feiceann sí béil á n-oscailt is á ndúnadh ach focal dá bhfuil á rá acu ní chloiseann sí. Fós, níl sí in ann bun ná barr a dhéanamh de scéal an bhá ar chor ar bith. Dá gcaillfí duine den chúpla, ní fhéadfadh sí maireachtáil gan iad. Seans nach maith an rud é ag deireadh an lae a bheith sáinnithe amuigh anseo ina haonar. Beartaíonn sí na coirscéinséirí a sheachaint anocht agus cuireann an DVD Sense and Sensibility ar siúl. Ní fada go dtiteann sí ina codladh.