Thuas | Thíos

Fadó fadó bhí dhá dhomhan ann. An dá dhomhan seo, an domhan thuas agus an domhan thíos níor fhlaithis agus tír, ná talamh agus ifreann iad ach dhá ghnáthdhomhan éagsúla iomlána a bhí mar scátháin ar a chéile. Sa dá dhomhan bhí sonas is séan i réim. Bhí suairceas agus cairdeas iontu, grá agus bá. Ach bhí beirt ann nach raibh baileach chomh sona ná séanmhar céanna. Sa domhan thuas, bhí bean ann, bean álainn uasal oirirc ab ea í, ach ainneoin a raibh timpeall uirthi sa domhan thuas ní sona ná séanmhar a bhí sí. Thug sí grá don uile mhíol beo sa domhan thuas: éanlaith an aeir, míolta na mara agus beithígh na coille. Ach bhí bearna dholíonta ina saol aici agus níor thuig sí conas a líonadh.