Cruthú

Scríobhaim anocht gan pheann

Damhsaíonn mo mhéara ar do chraiceann

Cumaim dán

Tusa mo mhian de léitheoir

Éisteann tú agus imríonn tionchar

Déanann tú do chuid féin den dán –

Tuigeann tú.

Sin athdhréachtú.

Léim do mholtaí

Titim i ngrá

Sin foilsiú

Bíogann tú, bogann tú

Ligeann tú osna, scairteann tú, béiceann tú

Ligeann tú liú –

Sin léirmheas

Titeann muid in aice a chéile

Brollaigh ag léimt, ag preabadh.

Tchím an grá i do shúile

Sin duais

Urraim, gradam.

Filíocht

Chum mé dán

Mo lámh i do láimhse

Mo bhéal ar do leiceann

M’anáil ag gríosú do chraicinn.

Páipéar mín do chraicinn

Mo rogha meáin

Séimhscríbhneoireacht do phóg

Mo rogha comhfhreagrais.

Dubhán Ó Longáin