An Búda agus an Bhó le Gabriel Rosenstock
The voice of Love seemed to call to me,
but it was a wrong number.
P. G. Wodehouse
Tá mo dhá lámh á leadradh aige:
Aon dó trí ceathair cúig sé
Aon dó trí ceathair cúig sé
Father Lehane ab ainm dó
Fear rugbaí
Bhí spéis aige sa diagacht
Thaitin P. G. Wodehouse leis
Tá bó ag cogaint na círe go mall:
Aon dó trí ceathair cúig sé
Aon dó trí ceathair cúig sé
D’éirigh tú as an bhféin-phionós, a Bhúda
Nuair a chan bádóir
‘Brisfidh an bogha
A tharraingítear rótheann . . .’
Tá mo dhá lámh á leadradh aige:
Aon dó trí ceathair cúig sé
Aon dó trí ceathair cúig sé
Father Lehane ab ainm dó
Fear rugbaí
Bhí spéis aige sa diagacht
Thaitin P. G. Wodehouse leis
Tá bó ag cogaint na círe go mall:
Aon dó trí ceathair cúig sé
Aon dó trí ceathair cúig sé
Cuirim aguisín le seanrann:
Is maith í an bhó
Is bainne í le n-ól
Is im í agus feoil
Is solas geal ar bord
Deineann a heireaball rón
Agus a hadharca ceol
Agus is maith é a leathar
Chun fearb a fhágaint ar lámha na n-óg
Tá mo dhá lámh á leadradh aige:
Aon dó trí ceathair cúig sé!
Aon dó trí ceathair cúig sé
Father Lehane ab ainm dó
Fear rugbaí
Bhí spéis aige sa diagacht
Thaitin P. G. Wodehouse leis
Tá bó ag cogaint na círe go mall:
Aon dó trí ceathair cúig sé
Aon dó trí ceathair cúig sé