Beag beann ar chách: Máire Mhac an tSaoi sa Spáinn (1949–1951)

Bhí an t-úrscéalaí Kate O’Brien ag obair mar mháistreás i dTír na mBascach sna 1920idí nuair a chrom sí ar an scríbhneoireacht ar dtús. Tá blas na Spáinne le haithint ar go leor dá saothar agus go speisialta ar an úrscéal Mary Lavelle a bhaineann le bean óg Éireannach a théann chun na Spáinne mar mháistreás agus a thiteann scun scan i ngrá le fear pósta – ainneoin go bhfuil sí luaite i gcleamhnas le fear sa bhaile. Thug Mary Lavelle a dhúshlán do bhord cinsireachta na hÉireann agus cuireadh cosc iomlán ar an úrscéal nuair a foilsíodh é sa bhliain 1936.