Spiritual Wounds Trauma, Testimony & the Irish Civil War.

Lean conspóid ghangaideach foilsiú Thuarascáil an Choimisiúin um Institiúidí Máithreacha agus Leanaí, in Eanáir na bliana 2021. Ar na húdair ghearáin a bhí ag lucht cáinte na tuarascála bhí an beag is fiú - an neamart glan, dar le go leor - a déanadh de theistíocht na n-íospartach a tháinig i láthair an Choimisiúin agus a thug tuairisc ar ar bhain dóibh sna hinstitiúidí sin. Ba léir ón gconspóid gurbh é croí na ceiste agus na feirge sa scéal an t-idirdhealú a bhí á dhéanamh ag baill an Choimisiúin (staraí agus beirt shaineolaithe dlí) idir teistíocht nó teistiméireacht agus ‘fianaise’. Ráiteas nó tuairisc a raibh taifead scríofa comhaimseartha ann á dhearbhú, b’in, ba chosúil, fianaise a gcaithfí aird a thabhairt air. Ach, dar le go leor, b’in tuiscint ar ‘fhianaise’ a bhí róchúng agus éagórach ar fad ar theistíocht na n-íospartach.