Imrothlú mór an cheoil!

Bhí ceirníní Ghael Linn lárnach sa turas fionnachtana sa cheol traidisiúnta a rinne mise agus an iliomad ceoltóir agus éisteoir eile ó 1957 i leith. In agallamh raidió a rinne mé roinnt mhaith blianta ó shin leis an Ollamh Mícheál Ó Súilleabháin – nach maireann, faraor, agus a bhí cliste agus tuisceanach i gcónaí maidir le go leor gnéithe den cheol Gaelach agus den traidisiún – thug sé sórt mionléiriú dom faoi sheachadadh thraidisiún an cheoil ó ghlúin go glúin agus na bealaí éagsúla gur féidir leis tarlú. Cinnte, a deir sé, gurb é an modh díreach, duine le duine, an chaoi is fearr – foghlaim agus teagasc ó cheoltóirí nó ó amhránaithe oilte a bheith ar fáil don té atá ag lorg slí isteach chun na scileanna agus na rúin sin a bhíonn beagáinín deacair uaireanta a bhaint amach ag an tosaitheoir agus an dalta.