Banscríbhneoirí bisiúla ár linne

Beirt bhanscríbhneoirí Gaeilge a bhí ar eolas ag Nuala Ní Dhomhnaill nuair a chuaigh sí i mbun na filíochta an chéad lá: Caitlín Maude, a casadh uirthi ag Scoil Gheimhridh Chumann Merriman sa bhliain 1969 agus Máire Mhac an tSaoi, ar léigh sí a cuid dánta ar scoil. Bhí mná eile ann, ar ndóigh, ach gur ligeadh brat mór díchuimhne anuas orthu agus gan ach tagairtí fánacha le fáil dóibh sa scoláireacht ar thraidisiún na nGael. San aiste cháiliúil ‘What Foremothers?’, d’aithin Ní Dhomhnaill gur fáisceadh cuid éigin dá fuinneamh cruthaitheach féin as an dóchas a bhí aici go mbunófaí canóin nua lá éigin, canóin nach gcosnódh an éagsúlacht ach a chothódh í.