Beir an solas leat

I mbreacsholas na maidine a tháinig sé amach as an teachín. Rith an madadh a fhad leis, í ag léim agus ag sceamhaíl, agus síos léi i dtreo an chladaigh, ach thiontaigh a máistir ar chlé, ag dul suas an cnoc. Ina lámh bhí casúr agus dornán tairní agus thug sé aghaidh ar na crainn ag ciumhais a thalaimh. Ní raibh ach cúpla crann ina seasamh ar garda ann ach caithfidh go raibh an fána suas thar an chnocán i dtreo an tsléibhe clúdaithe le crainn darach tráth dá raibh, óir go dtagtaí ar dhair phortaigh uaireanta agus iad ag baint na móna. Úsáideadh an dair phortaigh sin do rachtaí dín, den chuid is mó, ach rinne duine de na comharsana céachta as an adhmad dhubh bhuanaithe.