Ríon na Mara

I dtosach, níl ionam ach an cruas agus an dorchacht gan mothú ná meabhair chinn. Ansin, buille de mhiotal faobhrach in aghaidh an chruais agus músclaítear mo chéadfaí ionam in aon bhladhm ghéar amháin. Tarraingíonn an chéad bhuille buillí eile. Níl ionam ach bloc garbh adhmaid go fóill ach airím go bhfuil cló nua á chur orm. Seo mo cheann á nochtadh san adhmad agus m’aghaidh claonta go grástúil chun tosaigh. Ansin is é mo bhrollach a ghearrtar amach, ansin mo ghéaga láimhe, dá ghairbhe féin iad go fóill. Thíos faoi mo choim, ní cosa a dheilbhítear dom ach eireaball lán gainní a leathnaíonn amach ina eite ag a bhun.