Rotorua
Julie Breathnach-Banwait
Tá na clocha ag análú a gcuid luaithe ruibhí
Ag baile a shúnn an sulfar gan cuireadh inár bpolláirí
Déanann muid meas i bhfad uaidh is troideann muid a ghéire
Is súnn sé trínár gcuid mascanna laga
A chruthaigh muid le giodar ag tús na cuairte.
Tá an phuiteach ag bríbhéireacht neascóidí móra teo
Is faireann na cuairteoirí na géasair ag séideadh lán
A gcuid srón lena seilí go sotalach
Buaileann muid ár mbosa ag moladh áilleacht na pléisce
Greamaíonn bladhrach an Haka is an choisíocht throm inár gcluasa
Tatú na tréanfhear is an tā moko ag maisiú a gcraicinn is ag tabhairt
Ceangal dá dtreibh
Is sneachta ar bharr cnoic ag sileadh mar uachtar tiubh
Craosanna cúnga, fánsruthanna fíochmhara, uiscí na habhann ag preabadh go trodach
Ag dúiseacht a cuid cuairteoirí óna saol strambánach
Ó chathaoireacha leathair is boird ghloine
na n-oifigí go bhfeicfidís go bhfuileadar beo
Chun an nádúr a bhagairt is a cheansú le cumas fir.