Dánta le Mike Mac Domhnaill
Cad tá le creidiúint?
Sioc!
Tá sioc ar an gcarr!
Cé a cheap go mbeadh sé chomh fuar
leanaimid an Nuacht anso
Réamhaisnéis na hAimsire
ach faic ní dúradar
“Comhcheilg!” ag dul timpeall
na húdaráis ag iarraidh sinn
a chur as ár meabhair
uisce faoi thalamh? eolas á choimeád siar?
bíodh do rogha agat
táimid trína chéile go mór
Táim díreach tagtha isteacht
tá sioc ar an gcarr
an féidir é chreidiúint?
An féidir?
Clár Dúlra
Bím ag eisteacht
le Mooney Goes Wild
mar chothú intinne
cinnte go mbeidh
greamanna beaga dóchais ann
cé go bhfuil an t-oighear ag leá
an fharraige ag ardú
an t-aer –
oscail d’fhuinneog, a chara,
is abair liomsa –
éistim le Mooney
(roimh dhul a chodladh)
nó go scaoilfear an teannas sna matáin
nó go scaipfidh an bhuairt
nó go dtiocfaidh éiníní na dTrópaicí
ar foluain sa mhaothán tosaigh
nó pé áit a oireann dóibh im cheann
na dathanna geala
om thionlacan ar ais
don mbuachaill óg
chuig na leabhair bhailiúcháin
nuair a bhíomar go léir sa tóir
ar Phictiúr-48 den iolar fíréan –
an ceann a coimeádadh siar
tá fhios agat –
agus chím os mo chomhair
na 47 pictiúr eile:
hiéana, hiopó, gach diabhal ainmhí
téir a chodladh anois
le guth meidhreach Mooney
od chur chun suain
ag insint dúinn an scéal
le braon dóchais
caite sa mheasc