LÁ i gCATHÚ

Léigh mé Lig Sinn i gCathú den chéad uair agus mé i mo mhac léinn i gcathair na Gaillimhe. Ní cuimhin liom conas a tháinig mé ar an leabhar ach táim cinnte nár chuir éinne iallach orm é a léamh; ní hé go mbíodh sé ar an liosta léitheoireachta ó roinn na staire ná ó roinn na seandálaíochta! Is dócha go raibh mé sa tóir ar leabhra a bhí nasctha le saol an mhic léinn i nGaillimh, rud ar nós Tumbling in the Hay, an t-úrscéal barrúil ar sconnairí de mhic léinn liachta i gColáiste na Tríonóide ag tús an fichiú haois. Faraor, is mór an trua nach raibh níos mó suime ag mic leanna na Gaillimhe i bpeann ar pár seachas bean ag beár.