Trom ar an ól

Ar thaobh na láimhe clé nuair a shiúlfá isteach is ea a bhí an chontúirt. Leathshlí síos na contúirte, bhí bosca Tayto, a dhein sórt claí teorann idir an siopa is an tábhairne. Dhéanfainn deimhin de seasamh in aice leis an mbosca sin, fé mar a bheinn ag déanamh gnó sa tsiopa. Dhéanfainn méirínteacht ar m’fháinne cluaise le linn dom bheith ag feitheamh. B’é Tomás fear an tí, balcaire fir le croiméal seanfhaiseanta. Leagfadh sé an ghloine taobh thiar den mbosca, sa tslí is nach raibh le déanamh agam ach mo lámh a shíneadh siar, slog tapaidh a bhaint as, agus ligint don mbraoinín mé a théamh. Thiocfadh maolú ar an gcreathadh im láimh ina dhiaidh sin.